Da aula ao debate: o estudantado de Federalismo Fiscal participa en IDEAGOV-Local 2026

O estudantado da materia Federalismo Fiscal da Universidade de Santiago de Compostela participou en IDEAGOV-Local 2026, celebrado o pasado 18 de setembro no Pazo de Mariñán.

A xornada permitiulles seguir de preto un debate actual sobre o financiamento dos gobernos locais e coñecer como algúns dos temas traballados durante o curso se abordan na práctica.

Ao longo do día, o estudantado asistiu a diferentes sesións dedicadas á participación dos municipios nos ingresos das comunidades autónomas, á situación e ás perspectivas da PICA en Galicia e aos aspectos financeiros da proposta de reforma da Lei de Administración Local de Galicia (LALGA).

Tamén puideron escoitar directamente representantes das administracións públicas, investigadores e responsables municipais, entre eles varias persoas á fronte de distintos concellos, e coñecer as diferentes perspectivas presentes no debate sobre o financiamento local.

A asistencia á xornada permitiu así conectar os contidos estudados na materia cun debate que está a ter lugar actualmente en Galicia, achegando o estudantado a cuestións como a distribución de recursos entre os distintos niveis de goberno, o financiamento dos municipios e as relacións financeiras entre as administracións.

Deste xeito, IDEAGOV-Local 2026 ofreceulle ao estudantado a oportunidade de complementar o aprendido na aula cunha experiencia directa nun espazo de debate académico e institucional.